LACLÚBAR,
Ó MAK ISIN-LOLON IDA HO KLAMAR OIOIN
Ha’u tuur no koko buka-kompriende,
liuhosi hanoin ida be fehan tebes, kona-ba ha’u-nia rain Laclúbar. Hakarak atu
hatene horiuluk nia harii-an oinsá no moris halo nu’usá; ohin-loron nia to’o iha
ne’ebé no oinsá nia hala’o hela nia moris; aban-bainhira nia sei la’o to’o
ne’ebé no sei halo sa’ida hodi nia sai oinsá? Laclúbar, ó nu’udar isin-lolon ida
ho klamar oioin ne’ebé bei-ala sira ho ami hotu harii hosi tempu ba tempu.
Ó-nia isin-lolon toba hakmatek
iha fatin hakmatek ida maibé ó-nia klamar oioin la’o no buka-tuir ami
bara-barak, loron ka kalan, iha fatin oioin. Iha ema-nia rain ami temi ó-nia naran, ha’u Laclúbar oan ka ha’u hosi Laclúbar. Ó nia emar lubun ne’ebé
matenek, iha Laclúbar laran ka iha fatin oioin, sei foti no tane ó. Ema ne’ebé
hatene no rona ó-nia naran sei hahii ó tanba ó iha abakate, minarai, aikameli, kafé,
tua-mutin no tua-sabu, ananáx, bani-been, koiaba, fore-rai, sabraka no aifuan
fresku seluk ho rikusoin hotu ne’ebé ó iha, maske la barak hanesan ema nian
maibé ó mós iha natoon.
Ó-nia
klima ne’ebé malirin fresku halo ema barak temi iha fatin oioin. Bainhira ha’u
fila hosi ema-nia rain, iha foho Henuk, ha’u nia isin hahú sente ó-nia malirin
no matan hateke daudauk hodi haree-hetan, hosi dook, ó-nia tetuk-lidun ne’ebé
hadulas ho foho Maubere, Kehatu, Huni’in, Kakolo tesik to’o Kurli’a no Samaur. Uma
sira ho koor oioin, mean, matak, mutin, malahuk, azúl nomós koor seluk tan. Iha tempu udan, du’ut no aitahan sira buras tebe-tebes, hodi
haburas tebes hau-nia matan-hateke.
Ha’u husu nafatin
rahun-di’ak hosi ó-nia universu hotu, ne’ebé sei namahur tuir laloran-anin
ne’ebé buras no sei hasulin mai ha’u-nia moris.
Francisco de Araújo
Furak primu...tuba nahati ti larek usar larek naun...odi huat nahati ita larek laclubar...abracos
ReplyDeleteObrigadu primu. Ita nobu tuba nahati odi hu'at ita larek. Abrasu
Delete