Laclúbar hahú hosi tinan 1999
nia rohan mai to’o ohin loron
(hamatan hosi lidun oioin)
Husi: Francisco de Araújo
Iha artigu ida-ne’e ha’u koko atu
hakerek kona-ba Laclúbar hahú hosi tinan 1999 nia rohan mai to’o ohin loron ka
hafoin hala’ok okupasaun Indonézia nian hetan rohan hodi tama ba hakat dahikus
ukun rasik-an. Ha’u la hakle’an kona-ba akontesimentu istóriku sira maibé haree
liu ba mudansa sá mak iha no ida-ne’ebé seidauk iha, tuir ha’u-nia hareen no
lalehat krítiku-analítiku sira liuhosi lidun oioin.
Hafoin rona tiha rezultadu konsulta populár, 4 Setembru 1999, ne’ebé hatudu katak Timór mak manán, hodi kore-an sai hosi indonézia, hamosu konflitu boot iha territóriu tomak hodi halakon ema barak nia vida no hahat edifísiu públiku sira, liuliu iha kapitál Díli nomós distritu sira, uma privada populasaun nian nomós estragu balun ba uma kreda sira. Iha sorin seluk populasaun barak hosi parte autonomia nian tenke husik sira-nia moris fatin hodi halai-tuir Indonézia sira bá Timór Osidentál. Barak husik hela feen ka la’en, oan, família no plantasaun sira.
Iha Laclúbar, iha fulan Setembru nia laran, militár
indonézia sira, hakarak ka lakohi, tenke foti ain hodi fila hikas bá sira-nia
rain. Maluk sira hosi pró-integrasaun nian mós deside hodi husik hela Laclúbar
no la’o-tuir mós sira hodi bá hela iha Timór Osidentál. Balu fila ona no balu
seluk sei hela nafatin iha ne’ebá. Iha vila laran, ahi naksuar halo edifísiu
públiku no uma populasaun nian sai motuk, buat barak rahun, no halakon ema balu
nia vida. Bainhira hateke-tuir hosi Tidin-Botir ba Fatulaun, ema wa’in be wa’in
la’o tuir dalan-dalan bá Manatuto. Sira sunu uma tuir dalan halo ahi naksuar, lakan-naburun no hamosu tata’uk
ba populasaun hodi halai namkari no hamosu lalakon ba soin barak. Ai-anar metan sira nu’udar
makturik fitar-kle’an no fitar-kletik ba istória ahu-kdesan sira.
Liutiha ida-ne’e, horikle’un Laclúbar nian sai badín
iha tempu balu nia laran. Ema sira be subar iha ai-laran, fatuk no mota-ku’ak,
kadalak oan sira hahú tama ba vila tan hetan ona liberdade. Aswa’in Laclúbar
oan sira ne’ebé hatudu hirus-matan nakloke iha tempu luta nian hamutuk ho
aswa’in FALINTIL, ukun-na’in, juventude no populasaun tomak , konsentra iha
Laclúbar tan mehi ne’ebé hein tinan barak nia laran sai realidade. Administrasaun Indonézia nian la bele kontinua
tan no Timór tenke hatuur rasik ninian.
Timor hahú harii nia Estadu, uluklai, liuhosi
Administrasaun Tranzitória UNTAET nian.
Ho liberdade ne’ebé hetan, dalan ba ema hotu nakloke luan
liután. Ema hotu iha liberdade ba sirkulasaun, edukasaun, saúde no seluseluk
tan, satán Timór hatuur nia Estadu nu’udar Estadu Direitu Demokrátiku. Ema
hotu-hotu haksolok goza buat hirak-ne’e hotu. Balu goza tuir nia dalan no tuir
ninia limite. Balu seluk goza hodi abuza no hakat-sai hosi nia dalan no
la’o-liu nia limite. Iha direitu no Direitu, iha liberdade maibé la bele hakat liu to'o libertinajen.
Iha parte edukasaun, oinsá atu hahú fila-fali prosesu
ensinu-aprendijazen?
Ha’u hanoin,
prosesu ida-ne’e akontese-hanesan iha Timór laran tomak. Ho limitasaun ne’ebé
iha no rekursu umanu be menus, iha Ensinu Primáriu hanesan mós ba Ensinu
Pré-Sekundáriu (iha tempu ne’ebá ES Dom Basílio seidauk iha), matenek Laclúbar
oan sira, balu ho nível akadémiku ensinu sekundáriu, balu baxarél, hatudu kbiit
ne’ebé iha no nakonu ho esperiénsia, maske la’ós formadu atu sai profesór,
halibur malu hodi harii eskola atu nune’e labarik no joven lubun be lubun tama
hikas eskola hafoin fulan balu nia laran para tiha. Prosesu sira-ne’e hetan
tulun-lisuk hosi parte oioin no ikusmai hatudu rohan ne’ebé di’ak duni. Mestre sira hanorin ho di’ak
nune’e mós alunu sira aprende ho di’ak. Iha Eskola Pré-Sekundáriu Laclúbar, ha’u
sei hanoin epizódiu balu be sente komik uitoan entre mestre no alunu sira (ida
mós ha’u), maka, bainhira intervallu, lori bola kueru sadik malu no “purada”
malu iha sala ida be mamuk hela no luan tebes. Kuaze loro-loron, maibé iha
períudu balu de’it. Mestre sira ne’e maka hanesan, liuliu: mestre Joni, mestre
Ameu no sira balu tan. Alunu sira fali mós mesak ema komi-komik de’it. Hamnasa,
hirus malu, goza malu, hameek malu, nst. Ne’e ha’u konsidera nu’udar epizódiu
divertimentu ida.
Tempu la’o nafatin no mudansa hahú iha. Governu
tau-matan nafatin ba eskola sira, hakbiit profesór sira liuhosi formasaun oioin
ka kursu intensivu sira, kria kondisaun ka tau fasilidade iha eskola sira.
Reabilita eskola tuan sira no harii eskola foun balu iha fatin ne’ebé uluk
seidauk iha, hanesan, iha Fatulaun, Tidin-Botir, Samaur, Sasahi no fatin seluk
tan. Uluk, ema hotu tenke la’o dook bá eskola. Hanesan ami uluk tenke la’o hosi
Tidin-Botir bá to’o Bora. Tuun-sa’e, tuun-sa’e, udan, anin, loromanas no
hamlaha. Maibé tenke la’o duni tanba eskola besik la iha. Ohin loron ami nia
alin sira la la’o tan ona bá dook, maske lubun balu sei la’o-dook uitoan hosi
Kakolo, bá Tidin-Botir ka bá Samaur. Iha sorin seluk, bainhira seidauk harii ES
Dom Basílio, tenke bá eskola iha Manatuto ka Díli.
Mudansa sira-ne’e di’ak tebes maibé, iha-ne’e, ha’u
kestiona buat balu, liuliu ba alin ki’ikoan sira. Ohin loron mundu nakloke luan
tebes ba teknolojia no ita iha direitu tomak atu uza maibé tenke uza ho kuidadu
no tuir nia dalan. Ida fali maka, ha’u la tau kanuru ba imi nia direitu atu uza
buat sira ne’e. Ha’u só fó hanoin de’it. Ida-ne’ebé ita bele uza ona, uza.
Ida-ne’ebé ita seidauk bele karik, hein lai. Labarik sira iha Ensinu Primáriu
nomós Pré-Sekundáriu, bele dehan barak ona, ohin loron loko-an tebes ho
telefone. Nakretek tun-sa’e ho telefone. Tuir dalan-dalan buti telefone, no
haluhan atu bá lalais eskola. Iha eskola, la konsentra ba matéria ne’ebé mestre
hanorin tan nia iha direitu atu buti telefone. Nia nunka hanoin dehan nia iha
traballu ruma atu halo, tan buti hela de’it telefone, dalaruma oras 24 nia
laran. Satán telefone ho kámara, facebook
24 oras. Nu’usá la lee livru ruma ka halo traballu ruma? Iha dezvantajen
barak maibé ha’u la bele temi hotu iha ne’e. Klaru iha vantajen barak mós.
Nafatin kona-ba edukasaun, ajénsia estranjeira barak
mós tulun maka’as hodi haforsa no hakbiit prosesu ensinu-aprendizajen.
Oinsá iha área saúde, infra-estrutura, agrikultura no
relijiaun?
Iha mudansa barak mós. Nu’udar ita haree, iha área
saúde mudansa lubuk ida ita hetan. Iha suku-suku iha ona sentru saúde ho médiku
ida-idak no enfermeiru sira nomós fasilidade sira. Ne’e bele fó asisténsia
saúde lalais ba komunidade sira-ne’ebé hetan moras. Ida-ne’e hosi parte Governu
nian. Iha sorin seluk, Irmaun São João de Deus sira mós loke ona Ospitál mentál
no TBC ida iha Laclúbar vila, Batara, hodi fó asisténsia saúde mentál no
tuberkuloze ka TBC ba ema sira-ne’ebé hetan moras hirak-ne’e. Ne’e di’ak tebes
mai ita no ita agradese ba ida-ne’e. Nune’e mós sira la servisu de’it ba
kestaun saúde nian, maibé sira mós fó-tulun maka’as ba foinsa’e lubun hosi
Laclúbar no Soibada balun, iha vida espirituál nian no asisténsia estudu nível
universitáriu nian, ne’ebé balu sai ona nu’udar Irmaun São João de Deus no
barak sai ona nu’udar lisensiadu ka baixarél iha área oioin. Ha’u la sala,
sira-nia asisténsia estudu ne’e nu’udar “assistência em cadeia” katak sira
ajuda ema ida to’o ramata, ema-ne’ebé hetan ajuda ne’e selu fali ema ida seluk,
nune’e ba nafatin.
Iha parte infra-estrutura, buat balu la’o-di’ak no
barak seidauk. Di’ak maka naroman eletrisidade tama ona iha fatin barak, maibé
la’ós hotu-hotu. Estrada to’o agora sei nafatin hela, aat liután iha. Ku’ak
sira lori rai taka, la kleur udan-been mai sobu.
Iha parte relijiaun, uma-kreda, na'i-lulik no sarani sira hatudu nafatin beran boot ba malu hodi haklaken fiar ne'ebé buras horiuluk kedas mai to'o ohin loron. Rohan-kmanek ida be ita mós hetan hafoin ukun-an maka ita hamriik mesak nu'udar parókia. Hafoin ida-ne'e, iha na'i-lulik Francisco Segueira nia tempu, harii tan estasaun, kapela, gruta tuir área ida-idak. Ksolok mós ba Laclúbar oan rasik (no sira-ne'ebé raan-kahur) be sai ona na'i-lulik, hanesan, Pe. Joaquim, Pe. Iju, Pe. Nelinho, Pe. José. Lubuk ida mós sai ona Irmaun São João de Deus, hanesan, Ir. Boni, Ir. Elvis, Ir. Bento, Ir. Vitorino, nst. Foinsa'e barak mós oras ne'e hala'o hela kursu iha semináriu sira. Ita hein sira mós sei hetan rohan ida be nakonu ho roman nabilan Na'i nian. Nune'e mós barak sai ona madre. Iha dékada ida resin ne'e nia laran mós, frade (frater) no diákonu barak be mai serbí iha Laclúbar barak sai ona na'i-lulik, hanesan, Pe. Domingos Gusmão, Pe. Eusébio, nst. Sira serbí di'ak tebes ba sarani Laclúbar.
Iha parte relijiaun, uma-kreda, na'i-lulik no sarani sira hatudu nafatin beran boot ba malu hodi haklaken fiar ne'ebé buras horiuluk kedas mai to'o ohin loron. Rohan-kmanek ida be ita mós hetan hafoin ukun-an maka ita hamriik mesak nu'udar parókia. Hafoin ida-ne'e, iha na'i-lulik Francisco Segueira nia tempu, harii tan estasaun, kapela, gruta tuir área ida-idak. Ksolok mós ba Laclúbar oan rasik (no sira-ne'ebé raan-kahur) be sai ona na'i-lulik, hanesan, Pe. Joaquim, Pe. Iju, Pe. Nelinho, Pe. José. Lubuk ida mós sai ona Irmaun São João de Deus, hanesan, Ir. Boni, Ir. Elvis, Ir. Bento, Ir. Vitorino, nst. Foinsa'e barak mós oras ne'e hala'o hela kursu iha semináriu sira. Ita hein sira mós sei hetan rohan ida be nakonu ho roman nabilan Na'i nian. Nune'e mós barak sai ona madre. Iha dékada ida resin ne'e nia laran mós, frade (frater) no diákonu barak be mai serbí iha Laclúbar barak sai ona na'i-lulik, hanesan, Pe. Domingos Gusmão, Pe. Eusébio, nst. Sira serbí di'ak tebes ba sarani Laclúbar.
Ne’e mak ha’u-nia
hateken ida ba kotuk no hareen ida ba ohin loron kona-ba Laclúbar.
Furak, keta haluha inklui mós ho istória ba krize 2006 nian bainhira dezlokadu balun halai sa’e ba Lalubar iha biban ne’ebá, kmanek!
ReplyDeleteObrigadu ba komentáriu, maun Fonso. Di'ak, ne'e mak ha'u sei koko halo edisaun fila-fali hodi inklui mós akontesimentu istóriku balu tan ne'ebé importante. Ha'u hanoin atu hakerek di'ak liu no kle'an liu tan kona-ba akontesimentu istóriku, no fatin luta nian sira, ita presiza halo peskiza ruma ba luta-na'in ka istoriadór sira. Nune'e ita iha faktu istóriku natoon atu bele hakerek. Ida-ne'e presiza apoiu ruma nomós tempu.
Delete