ITA MOSU IHA RAI IDA-NE'E

Ita mosu iha rai ida-ne'e,

Ita moris iha rai ida-ne'e,

Ita hela iha rai ida-ne'e,

Ita boot iha rai ida-ne'e,

Ita sei lakon iha rai ida-ne'e,

Ita sei sa'e rai ida-ne'e,

Rai Timor (Loro)(sa'e).

(Loro)(sa'e),

Sei halo ita sa'e ba nafatin.

Sa'e, hodi la'o ba dook to'o rai dook,

Sa'e, hakat ba naroman to'o rai naroman,

Sa'e, hodi harohan to'o rai rohan,

Sa'e, hodi sai Na'i Lulik hodi hana'i rai lulik ida-ne'e.

Rai ne'ebé haree uluk loromatan sa'e,

Rai ne'ebé sente uluk loromatan nia manas, halo rai manas,

Halo ita sai Manas, ne'ebé la'ós hanesan feto-manas.

Maibé, hanesan

Ita manas iha matenek,

Ita manas iha polítika,

Ita manas iha funu,

Ita manas iha kultura,

Ita manas iha buat oioin iha ita-nia oin.

Oin ida, laran ida, fuan ida, hanoin ida, sai ida de'it iha rai ida de'it.

Rai ne'e sei la mate, rai ne'e sei la lakon, rai ne'e sei buras, rai ne'e sei dulas. Rai ne'e ita hotu nian.

Ukun ho didi'ak, ukun ho neon ho laran, ukun ho Domin, ukun responsabilidade. Hela ho responsabilidade, ho idade ne'ebé nurak, halo rai furak, nakonu ho lia murak.

Hadomi malu, hadomi Timor, iha Timor!