LORON MUNDIÁL BA POEZIA

AMAN FOUN BA RAI IDA-NE'E, HEAN AMI TOMAK IHA TASI HAKMATEK IDA, ITA BÁ TIHA LISUK IKAN!

Ohin, 21 Marsu, rai hotu selebra loron mundiál ba poezia, nune'e ha'u atu selebra pesoalmente loron ida-ne'e, ha'u deside atu dedika poezia ida tuirmai ba Dr. Francisco Guterres Lu-Olo ne'ebé eleitu nu'udar Timor-Leste nia Prezidente Repúblika foun ba periodu 2017-2022. Aman foun ba rai ida-ne'e. Bele lee poezia tuirmai:

HEAN AMI TOMAK IHA TASI HAKMATEK IDA

Kadalak oan sira suli neneik no suli-mutuk ona,

Ohin nakfilak ba we-inan,

We-inan hakmatek no atu sulin dadauk ba tasi,

Tasi ne'ebé luan no fehan tebes,

Tasi ne'ebé meer no nakonu ho ikan sira, ho kriatura oioin.

Hean ami tomak iha tasi hakmatek ida, ita bá tiha lisuk ikan!

Manu fuik sira be uluk hafuhu ó-nia dalan tarak sira iha ai-laran, ohin hahú hananu hodi fó-ksolok ba ó.

Rai-na'in lulik sira be uluk subar ó-nia ain-le'ut iha ai-laran, ohin se tilun hosi dook rona ó-nia Lian Vitória.

Iha tasi-lidun foun ne'e, ami no ita hotu husu atu halo tasi hakmatek nafatin hodi nune'e ró-ahi boot no bero sira nani ho hakmatek bá oin,

Hakmatek hodi tiha ikan sira,

Hakmatek hodi to'o bá tasi-fehan nia sudin,

Sudin ne'ebé ita hakarak atu to'o ba.

Hean ami tomak iha tasi hakmatek ida, ita bá tiha lisuk ikan!

Hosi rai-ulun to'o rai-ikun, tasi-feto to'o tasi-mane,

Ó sei sa'e ba foho dame nian hodi hateke ba tetuk sira-ne'ebé, dalaruma no dalabarak, buras ho konflitu, buras ho kiak no buras ho mukit.

Nune'e,

Hateke hodi haree-hetan ba,

Haree-hetan hodi bolu ba,

Bolu ho Lian Domin,

Bolu ho Lian Dame,

Bolu ho Lian Esperansa,

Atu ami la la'o sala dalan,

Atu ami neon-badinas,

Atu ami aten-brani nafatin hanesan uluk ó aten-brani hasouru funu-maluk sira,

No lori ami bá du'ut-matak no bee-horis sira.

Hean ami tomak iha tasi hakmatek ida, ita bá tiha lisuk ikan!

Parabéns loron mundiál ba poezia!

Parabéns ba Prezidente Repúblika eleitu!

Haku'ak boot!

Francisco De Araújo