BUIMESAK NI YINAN TI MALAHO

Foto: imajen google

Istória tradisionál (lenda) yisa akerek noro haha Idaté - klasifikadu 1º lugar (konkursu Ha'u nia Lian, Ha'u nia Rai - Fundasaun Alola

Nain lubuk yisa radiuk kabesi arbau luhan. He wo’ar, arbau sira hirosi bulik he sira bár ilét, rusi weir hatik nabenu he lehu matak tanti namo oras lebas. Biwakik, nain yisa nate’uk hori lehu lauk una sore wer, namo wo kamudak tan. Ni takuran raba he lehu matak nodi natarik una nalihun ha’e he arbau weir hatik yisa ni lalan. Lo’o ni ha’e, nasae oler lo lehu lauk nodi nabua.

Biwakik hina, malaho yinan yisa mananeko wer be una ninu tanti maró biak. Ni kadolar maru-marun tina dudus los edi nain lei ni tarin, naha nahilas oler lo ni sarak he hatu koak.

Foto: imajen google

Nalau oi hula lu, malaho lei abuk tanti tarik ene ba ninu lei, naha nadari oi nanahuak mahinak yisa. He lelon ene nanahuak lei namori, malaho nobunobu má rawa’a ni. Ni yinan nadomi los ni. Nabali wo’ar, nabali lelon. Sira rua ramori kiak, ramori terus he hatu koak he lelon wa’ik ni lalan.

He oras lelon, malaho yinan lei tina sa’ut bulik la-á be rodi rá. Naha hina bein noro la’etak ba’ek seri odi atais ni wanan anak lei. Lelon namuda waon una wo’ar, wo’ar namuda waon una lelon, nanahuak lei ka’olik didiu.

He lelon yisa, nalu’i naha ti ni amán ení:

- Tanti sá bení aba diuk oi noro ó he la’lu nia?

- Be u apaik noro u amák ba hemene?

- Ó animál yisa, naha au nain yisa oi, tantisá?

- Eta ni banodi au ma he la’lu nia?

Ni yinan nasei ha’e bulik naha nidá:

- Ai…! Ó sei lai ma! O lu’i noro midá la lu nia los, arabe ó bilika ma’és. Ó bilika manoin wa’ik. Ó amán ti au lahelok. Kamak warua ó ka’olik hali ohi tada lau tan. – Ni amán natán.

Mahinak anak lei nasero nodi kini’a oler he ni yinan ni wein nodi nalu’i oler deskulpa:

- Deskulpa inak! Au bi tada dar bení, ita u winak lahelok.

He lelon tuir ma, ni yinan nakaur naha ni maluk sira para odi sarani ni. Ranaran ni te Buimesak. Runa festa wo’ar ateman yisa. Rinu, rá, radansa, ratebe rata wo’ar atún.

Warila festa nobu oi, la-á laek naha be una rá. Yisa ni, ni yinan nusi mesa ha’e ni nodi tina sa’ut la’á he lelon ateman yisa he namo lalak. Buimesak takuran mesa ha’e bulikhe hatu-koak. He oras e’ni, ai ni hunan sira kaek yian los, manu ahui sira raluhur ti ma bulik rodi rá ai-hunan noro huan.

Foto: imajen google

Nanahuak ulosan yisa noro fisga he liman mana sa’ut manu-ahui be una natiru, kabesi meker Buimesak bara mór. Ni natiru loos kakoak yisa ma toun los he hatu-koak ene Buimesak ba takuran mesa ha’e. Ata Buimesak bana bua oi. Manu lei toun nuna ni taridu, ma’és namo nodi nanau meker. Nanahuak manek lei natama lo hatu-koak be una nahu’at naha kakoak-maten lei. Natama ti, ni taridu oi ti Buimesak. Sira rua ma’és oi ró. Kakoak-maten lalata hui ha’e. Sira rua huar tutu’un naha ti ro. Manek lei nakasek didiu Buimesak nodi nalu’i naha e’ni:

- Tanti sa bení ó ba diuk oi henia?

- Ó naran sá?

- Ó mesa he nia eh?

- Ó apain noro ó amán sira ba hemene?

Buimesak natán:

- Au Buimesak. Au mesa! Ú amák tina sa’ut ami lar á he namo.

Buimesak nalu’i oler:

- Tanti sa bení ó tama he la’lú nia, ó hori mene, naha ó naran sá?

- Au hori ú adak. Au naran Maumesak au má mesa. Au sa’ut manu yisa aba tiru be ba manahu ha'e he la’lú nia. – Manek lei natán.

- Oi… enlei! Hu’at ti naha mulau edi. – Mahinak lei natán.

- Tu’u yila ó amán nahilas? Be o apain nalau lo mene ? – Manek lei nalu’i nahati.

- Au bi tada dar! – Mahinak natán.

- Tanti sa be’ni ó lu’i ni? – Mahinak nalu’i oler.

- Hmm…! – Manek nuna hahan, bina tan dar.

- Mulau edi! – Buimesak naru’a.

Nanahuak manek lei bina tada hei te Buimesak ni amán hori malaho. Nidá didiu te nakasek los Buimesak.

- Buimesak, u kasek biak ó! U kasek kaben noro ó. Ó kamo’ok loos. Ó mesa ha’e, ó bilika diuk mesa henia. U kasek oro ó nara nia lo ú adak. – Manek nidá.

- Hmm… au wo u kasek hina ó. U kasek oro ó lau, arabe.... - Buimesak nidá.

- Arabe nusá? Loin saik ma! La sá ni bi yan? – Manek lei nalu’i.

Foto: imajen google

Buimesak nadada iis naboin naloin segredu kahida ti mori nik. Ni disidi sai hori hatu-koak lei odi lau lo manek lei ni adan. Ni amán bina tada dar. Manek lei noro ni lau lo ada, sira rua rala edi ro. Família hori manek nik rasimu ni yan los i runa festa durante lelon rua. Sira rua ramori kontenti los.

Wowo’ar Buimesak ni amán na tí berak he sira adar nodi ná batar he ada lalak. Manek lei bina tada dar te malaho lei Buimesak ni yinan. Bení lelon yisa near oi malaho lei. Lo’oni ha’e, warila sira ratí he namo, batar sirak la morik rataka mos oi.

Buimesak nasero los tanti ni kaben near oi ni yinan

- Tanti sa bení ó sero? – Ni kaben nalu’i.

- Ó bi tada dar e… malaho ene oba mear lei u winak e’ni. – Buimesak natán

- Aiihh…, tanti sa beni obi loin hina ti au durante ita rua hetan ro rata tamori amutuk? Deskulpa! Au bi tada dar. – Manek lei taridu nodi nalu’i deskulpa.

Lo’o ni ha’e, manek lei nalu’i deskulpa naha nasa’ut oler sabulu yisa odi baka oler malaho lei be odi ti a-oi.

Ahú hori e’ni, manek lei binear tan malaho de’ot. Ni respeitu sira leleo-lelon. Sira rua ramori edi he família yisa koñesidu los he sidade lei.

Autór: Francisco de Araújo

Istória tradisionál nia konta hori: Joaquim da Silva

************************************************************

Istória nia sai primeiru lugar he konkursu akerek istória tradisionál noro Haha Inak (Lian Materna) Idaté, Projetu "Ha'u nia Lian, Ha'u nia Rai", organiza hori Fundasaun Alola, servisu amutuk noro Ministériu Edukasaun be Prezidénsia Repúblika, RDTL, he tinan 2010. He oras eni Haha Inak nobu-nobu, inklui tetun noro Portugés, he Timor hetan oportunidade odi konkorre.